Petatah Petitih Minang

TAMU

Mak, amak nan ambo imbau, tapi sungguah pun amak nan ambo imbau, sifaik e ateh namo silang nan bapangka, karakok  nan bajunjuang, junjuangan sakalian urang sumando. Kami nan datang dari mudiak, kok jauah lah basonsong, ampiah lah basalami, lah ditapuak banduah, lah ditingkek janjang, lah duduak di jeroang kaduduak an nan ko. Rokok sabatang lah hanguih, paluah di dado lah kariang, rangah saku tiko lah lapeh. Ado nan takilan di hati, takalang dek pikiran, andak manyabuik kato nan bana, andak manampuah jalan nan luruih, lakuang e batinjau, kalam e basigi, alah ka buliah tu mak, sakian bana mak.

TUAN RUMAH

Palo mudo, sungguah pun palo mudo nan ambo imbau, sifaik e sagalo dunsanak kami nan datang dari mudiak. Tempo di awa cako, palo mudo nan datang dari mudiak ma antaan undiangan ka ambo, tapi sungguah pun ka ambo,  sifaiak e silang nan sapangka, karokok nan bajunjuang, junjuangan sakalian urang sumando, a labuah paundiangan palo mudo. kok jauah lah basonsong, ampiah lah basalami. Lah ditapuak banduah, lah ditingkek janjang, lah duduak di jeroang kaduduak an nan ko. Rokok sabatang lah hanguih, paluah didado lah kariang, rangah saku tiko alah lapeh. Ado nan takilang di hati, takalang dek pikiran, andak manyabuik kato nan bana, andak manampuah jalan nan luruih, lakuang e batinjau, kalam e basigi, lah kabuliah, kan baitu bana ndak palo mudo.

Ndak baitu palo mudo, dek tasabuik ateh namo silang nan sapangka, karakok nan bajunjuang, junjuangan sakalian urang sumando, istirahat bapinta, janji batiboan, baiyo ambo dulu palo mudo.

TUAN RUMAH ( DI PAIYOAN KA URANG SUMANDO )

Sutan, sutan nan ambo imbau, tapi sungguah pun sutan nan ambo imbau, sifaik e  ateh namo sagalo urang sumando nan duduak sahamparan, tagak sapamatangan. Kok Bisiak lah kadangaran, sorak lah takalampauan. Dunsanak kito nan datang dari mudiak, ma antaan undiangan ka ambo,dek amak baru  Sakedar kato nan bajawek, undiangan alun bapulangan. Tanto kato kamanjawek, undiangan ka bapulangan. Pulangan jo lah dek sutan, ko nan nama – nama e lah ka manjawek, ateh namo sagalo urang sumando disitu. Ba a Pulang urang sumando, lah pulang ambo pulo tu mah. 

SUMANDO

Sampai mak, kato amak yo ka bajawek lakeh, undiangan kabapulangan capek andak e, dek tasabuik ateh namo sagalo urang sumando, nan duduak sahamparan, nan tagak sapamatangan, istirahaik bapintak, janji batiboan. Ambo paiyoan dulu mak

SUMANDO ( DI PAIYOAN KA SASAMO URANG SUMANDO )

Sidi, bisiak lah kadangaran, sorak katalampauan. Tantang kato kabajawek, undiangan ka bapulangan, jawek lah dek sutan, ba a jawek sutan, lah jawek kito basamo tu mah. 

JAWEK SIDI

Da, tantang kato kabajawek, undiangan ka bapulangan, jawek jo lah dek uda kato amak tu, ba a pulang uda, lah pulang ambo pulo tu mah da, lamah e di tauah, senteang e dibilai, kok hanyuik basonsong. Sampai da

SUMANDO

Mak, tempo di awa cako, dunsanak kito nan datang dari mudiak, ma antaan undiangan ka amak, dek amak kato sajo baru bajawek, undiangan alun bapulangan, kan iko nan baiyo ka ambo mak.

Dek ambo mak, lah ditarik kato jo mufakaik, ateh namo urang sumando nan duduak sahamparan, tagak sapamatangan. Mancari bulek nan sagolek, picak nan salayang. Kok bulek lah buliah digoloangan, picak lah buliah di layangan. Tantang kato ka manjawek, undiangan ka bapulangan. Pulangan jo lah dek amak, ba a pulang amak, lah pulang kami pulo tu mah, ateh namo urang sumando. Senteang e babilai, lamah e batauah, sakian bana mak.

TUAN RUMAH 

Palo mudo, palo mudo nan ambo imbau, sifaik e samo takah tadi juo. Dibaco awa e, supayo nak dapek akia e. tempo di awa cako, palo mudo ma antaan undiangan ka ambo, a labuah paundiangan. Kok jauah lah basonsong, ampia lah basalami. ado nan takilan di hati, takalang dipikiran. Andak manyabuik kato nan bana, manampuah jalan nan luruih. Lakuan e batinjau, kalam e basigi, alah kabuliah, kan baitu bana kan palo mudo

Dek kami, alah batarik kato jo mufakaik mancari bulek nan sagolek, picak nan salayang. Kok bulek digoloangan, picak lah buliah dilayanga. Tantang lakuang ka batinjau, kalam kabasigi palo mudo, kok di like lah samo nampak, di esek lai taraso, di imbau lai ka babunyi, sakarek kan panjang, saikua kan panjang juo, kok tibo sadang dalam parundiangan, kito ajak dalam parundiangan, kok tibo sadang makan, kito ajak makan sakali.    tantang andak manyabuik kato nan bana, manampuah jalan nan luruih e palo mudo, alah balapangan labuah bakeh lalo, lah bakandak an janjang bakeh naiak, lah basingkok an pintu bakeh masuak, alah ba agiah kandak palo mudo namo e tu mah. Sampai palo mudo

TAMU

Lah ba agiah kandak namo e tu mak, iyo lah sanang di hati, lah sajuak di kiro – kiro. Di tanai jo bahu, di jujuang jo kapalo. Istirahaik dulu mak.

SAMBAH

TAMU

Mak, sungguah pun amak nan baimbau, sifaik ee takah tadi juo mak. Di baco awa e, supayo nak dapek akia e. Tempo di awa cako, tentang lakuang ka batinjau, kalam kabasigi. Kok mati lah tantu pusaro e, kok hilang lah tantu rimbo e. ba a kali salanjuik e mak, kok tumbuah sacaro nan bak nan ko, di hadapan niniak dengan mamak, di lingkuangan adaik jo pusako. Sabalum kato kadisabuik, undiangan ka dibaco, andak e tabaok an taratik manjilih, lelo jo kurenah, adaik sacaronyo. A nan di katoan adaik sacaronyo, dirunjaman lutuik nan duo, di takuah an kapalo nan satu, disusun jari nan sapuluah, di lewaan sambah, sambah manyambah kito namo an. Tantang taratik manjilih, lelo jo kurenah,  samo – samo kito baok an. Tantang renjeangan tangan jo lewa sambah e mak, kok buliah pintak jo pinto, kito gantuangan ka nan tinggi, kito sandaan ka nan gadang. Sakadar kato nan dibaco, undiangan juo nan disabuik. Kandak buliah pintak balaku. Sakian bana mak.

TUAN RUMAH

Palo mudo, palo mudo nan ambo imbau, sifaik e takah tadi juo palo mudo. Di baco awa e, supayo nak dapek akia e. tempo di awa cako, tentang lakuang ka batinjau, kalam ka basigi. Kok mati lah tantu pusaro e, kok hilang lah tantu rimbo. Ba a kali salanjuik e, kok tumbuah sacaro nan bak nan ko, di hadapan niniak dengan mamak, di lingkuangan adaik jo pusako. Sabalum kato kadisabuik, undiangan ka dibaco, andak e tabaok an taratik manjilih, lelo jo kurenah, adaik sacaronyo. A nan di katoan adaik sacaronyo, dirunjaman lutuik nan duo, di takuah an kapalo nan satu, disusun jari nan sapuluah, di lewaan sambah, sambah manyambah kito namo an. Tantang taratik manjilih, lelo jo kurenah,  samo – samo kito baok an. Tantang renjeangan tangan jo lewa sambah e mak, kok buliah pintak jo pinto, kito gantuangan ka nan tinggi, kito sandaan ka nan gadang. Sakadar kato nan dibaco, undiangan juo nan disabuik. Kandak buliah pintak balaku. Kan baitu bana ndak palo mudo.

dek ambo palo mudo,  mangauik indak sakali kameh, mamancuang ndak sakali putuih, mangabek indak sakali arek, istirahaik bapintak, janji batiboan, mananti pulo mudo.

TUAN RUMAH ( DI PAIYO AN KA URANG SUMANDO )

Sutan, sungguah pun sutan nan ambo imbau, sifaik e  ateh namo urang sumando nan duduak sahamparan, tagak sapamatangan. Bisiak lah kadangaran, sorak lah takalampauan. Tantang undiangan Dunsanak kito nan datang dari mudiak,. Tanto kato kamanjawek, undiangan ka bapulangan. Pulangan jo lah dek sutan, sungguah pun sutan,  kok nan nama – nama e lah ateh namo urang sumando disitu. Pulang sutan, lah pulang ambo pulo tu mah.

SUMANDO

Mak, ndak di ulang di jajak I bana do mak, kato amak ka bajawek lakeh, undiangan ka bapulangan capek, dek tasabuik ateh namo urang sumando, nan duduak sahamparan, tagak sapamatangan, istirahaik bapintak, janji batiboan. Ambo paiyo an dulu mak.

 SUMANDO ( babaliak ka tuan rumah )

Mak, tempo di awa cako, dunsanak kito nan dating dari mudiak, ma antaan undiangan ka amak, dek amak kato baru nan bajawek, undiangan alun bapulangan. Dek amak kini ko , iko nan bapaiyoan ka ambo, dek ambo kini ko mak, alah ditarik kato jo mufakaik, ateh namo sagalo urang sumando, mancari bulek nan sagolek, picak nan salayang. Kok bulek lah buliah di goloangan, picak lah buliah dilayangan,

Tantang kato ka manjawek, undiangan ka bapulangan, dek amak nan ba hadok ba hadang, jo dunsanak kito nan datang dari mudiak, pulangan jo lah dek amak, ba a pulang amak, lah pulang kami ateh namo urang sumando nan duduak sahamparan, tagak sapamatangan. Kok senteang kami bilai mak, kok lamah kami tauah mak, kok hanyuik kami sonsong, sakian bana mak

TUAN RUMAH

Palo mudo, palo mudo nan ambo imbau, sifaik takah tadi juo palo mudo. Di baco awa e, supayo nak dapek akia e. tempo di awa cako, tantang 

tempo di awa cako, tentang lakuang ka batinjau, kalam ka basigi. Kok mati lah tantu pusaro e, kok hilang lah tantu rimbo. Ba a kali salanjuik e, kok tumbuah sacaro nan bak nan ko, di hadapan niniak dengan mamak, di lingkuangan adaik jo pusako. Sabalum kato kadisabuik, undiangan ka dibaco, andak e tabaok an taratik manjilih, lelo jo kurenah, adaik sacaronyo. A nan di katoan adaik sacaronyo, dirunjaman lutuik nan duo, di takuah an kapalo nan satu, disusun jari nan sapuluah, di lewaan sambah, sambah manyambah kito namo an. Tantang taratik manjilih, lelo jo kurenah,  samo – samo kito baok an. Tantang renjeangan tangan jo lewa sambah e mak, kok buliah pintak jo pinto, kito gantuangan ka nan tinggi, kito sandaan ka nan gadang. Sakadar kato nan dibaco, undiangan juo nan disabuik. Kandak buliah pintak balaku. Kan baitu bana ndak palo mudo.

Dek kami palo mudo, kok lai sainjek salatak, lai sarantak ndak balain ragam, lah ba agiah kandak mah palo mudo

TAMU

Ba agiah kandak tu mak, iyo lah sanang di hati, lah sajuak di kiro – kiro. Kok ketek tapak tangan, jo niru ambo tampuang. Istirahaik dulu mak.

SIRIAH

TAMU

Mak, sungguah pun amak nan ambo imbau, sifaik takah tadi juo mak. Di baco e, supayo nak dapek akia e. tempo di awa cako, tantang lakuang ka batinjau, kalam ka basigi, kali nan kaduo e, tantang sitinah sambah. Kok mati lah tantu pusaro e, kok hilang lah tantu rimbo e. nan tinggi lah kito gantuangan ka nan tinggi, nan gadang lah kito sandaan ka nan gadang. 

Kali salanjuik e mak, kami nan datang dari mudiak, bajalan babuah latiah, malenggang babuah tangan, a labuah tangan kami. Mambaok siriah salangkok e, bamasuak ka dalam kampia siriah, urang nan limo basaudaro. Iko nan ba teteangan ka hadapan amak, tapi sungguah pun ka amak, sifaik silang nan sapangka, karokok bajunjuang, junjuangan sakalian urang sumando. Makan lah siriah kami sakapuah surang, labiah sakapuah elok bana, lalu dimasak an. Pintak buliah kandak balaku. Sakian bana mak

TUAN RUMAH

Sampai palo mudo, palo mudo, palo mudo juo nan ambo imbau, sifaik e takah tadi juo palo mudo, di baco awa e, supayo nak dapek akia e. tempo di awa cako, tantang lakuang ka batinjau, kalam ka basigi, kali nan kaduo e, tantang sitinah sambah. Kok mati lah tantu pusaro e, kok hilang lah tantu rimbo e. nan tinggi lah kito gantuangan ka nan tinggi, nan gadang lah kito sandaan ka nan gadang.  Kali salanjuik e palo mudo, palo mudo nan datang dari mudiak, kok bajalan babuah latiah, malenggang babuah tangan, a labuah tangan palo mudo. Mambaok siriah salangkok e, bamasuak ka dalam kampia siriah, urang nan limo basaudaro. Iko nan ba adok an ka hadapan ambo, tapi sungguah pun ka ambo, sifaik silang nan sapangka, karokok bajunjuang, junjuangan sakalian urang sumando. Makan lah siriah kami sakapuah surang, labiah sakapuah elok bana, lalu dimasak an. Pintak buliah kandak balaku. Kan baitu bana palo mudo.

Ba a rupo e dek ambo palo mudo, angan angan mambaok sansai, sansai mambaok badan hilang, cameh kahanyuik, gamang kajatuah e palo mudo. Tantang siriah palo mudo, Kok kasiah nan datang, andak e kan sayang nan mananti, kok siriah nan datang, andak e kan siriah juo nan mananti, tapi dek ambo kini ko hanyo sakedar rokok nan mananti, ka ba a dek palo mudo lai tu a.

TAMU

Ba a rupo e dek amak, angan angan mambaok sansai, sansai mambaok badan hilang, cameh kahanyuik, gamang kajatuah e mak. Tantang siriah mak, Kok kasiah nan datang, andak e kan sayang nan mananti, kok siriah nan datang, andak e kan siriah juo nan mananti, tapi dek amak kini ko hanyo sakedar rokok nan mananti, ka ba a dek palo mudo.

Nan rokok amak kan alah rokok kami namo e tu mak, takah itu lo siriah kami nan datang ko mak, siriah kami nan datang ko, lah siriah urang siko pulo tu mah mak, masak an siriah kami ko dulu mak.

TUAN RUMAH

Palo mudo, palo mudo nan ambo imbau, sifaik e kayak tadi juo baru palo mudo. Sabalum kandak ka di agiah, pintak ka balaku, ba rupo e undang – undang kami di tapi pasia namo e palo mudo, ibaraik e dabuak ombak e nan tadanga baru palo mudo, landai pasiah e lupo ambo mancaliak e palo mudo, ka ba a dek palo mudo tu a

TAMU

Mak, amak nan ambo imbau, sifaik e kayak tadi juo baru tu mak. Ba a rupo e dek amak, Sabalum kandak ka di agiah, pintak ka balaku, ba rupo e undang – undang amak nan di tapi pasia namo e, ibaraik e dabuak ombak e nan tadanga baru, landai pasiah e lupo amak mancaliak, ka ba a lai tu

Nan maesek yo  sahabih saruang mak, mancaliak sahabih pandang, kalau baitu mak, balapangan tu mah mak.

TUAN RUMAH

Palo mudo, palo mudo nan ambo imbau, sifaik kayak tadi juo palo mudo.   tantang siriah palo mudo, siriah palo mudo nan datang dari mudiak yo lai nampak rampak jo rimbun e.

Ba a tantang masak siriah e palo mudo, ado urang manyabuik 3 pakaro, ado juo 2 pakaro. Nan kini kito ambiak nan 2 juo dulu palo mudo. Nan patamo masak di makan, nan kaduo masak di parundiangan. Dek ambo, kok ado nan tatampuah salah satu, ka ba a dek palo mudo tu.

TAMU

Mak, amak nan ambo imbau, sifaik e kayak tadi juo baru mak. Tantang siriah mak, siriah kami nan datang dari mudiak yo lah nampak rampak jo rimbun e dek amak. Ba a tantang masak siriah e mak, ado urang manyabuik 3 pakaro, ado juo 2 pakaro. Nan kini kito ambiak nan 2 juo dulu. Nan patamo masak di makan, nan kaduo masak di parundiangan. Dek amak, kok ado nan tatampuah salah satu, ka ba a dek palo mudo, kan baitu bana ndak mak

Dek kami mak, asal kandak lai kabuliah, pintak lai kabalaku mak, sumbarang tapek batarimo suko mah mak

TUAN RUMAH

Alah masak siriah palo mudo di parundiangan namo e tu mh.

TAMU

Alah masak mak.